Размаўляй са мной на мове нацыі
LITARY склалі топ беларускамоўнага ў Брэсце
Не раз даводзілася ад беларусаў чуць у адрас прадстаўнікоў іншых нацый (у асноўным, студэнтаў-іншаземцаў, з Туркменістану, напрыклад): “Че это они говорят друг с другом на своем туркменском? Приехали в нашу страну — должны говорить на нашем языке”.
На жаль (ці на радасць?), кажуць гэта ў асноўным, на рускай мове, як бы не бяручы да ўвагі назву нашай нацыі. Такім чынам, незадаволеныя таксама размаўляюць не на “своем языке”. А дзе ў беларускім Брэсце можна пачуць, убачыць і атрымаць асалоду ад сапраўднай беларускай мовы?
1. Mart inn
Новая сетка супермаркетаў атрымівае плюс у карму за беларускамоўныя надпісы: “Кожны аўторак новая акцыя”, “Кулінарыя. Свежае і смачнае”, “MART INN — гэта выгадна”.
Парада: Зрабіць назвы прадуктаў і кошты на беларускай. Тролінг рускамоўных беларусаў вышэйшага ўзроўню!
2. Чыгуначны вакзал
У адчыненым пасля рэканструкцыі будынку залы адпачынку брэсцкага чыгуначнага вакзала надпісы прадстаўлены на міжнароднай англійскай і нацыянальнай беларускай мовах. Галасы з залы, якія хвалююцца за рускіх (“Наши братья не поймут”) — пахвалюйцеся лепш за сваю нацыянальную адметнасць. А рускія няхай вучаць англійскую, калі беларускую не хочуць.
Парада: Някепска было б, каб персанал вакзала таксама добра валодаў англійскай і беларускай мовамі.
3. Банкаматы
Вельмі прыемна атрымліваць грошы ад беларускамоўнага банкамата, які кажа табе: “Калі ласка” і “Дзякуй”.
Парада: Спыніце дэвальвацыю!
4. Харчэўня «Сваякі» (вул.Пушкінская, 5)
Адно з нешматлікіх месцаў у горадзе, дзе наведвальніку прапануюць беларускую кухню, у тым ліку казачную беларускую піцу.
Парада: На жаль, харчэўня толькі на першы погляд беларускамоўная. Даеш больш беларускасці!
5. Сацыяльная рэклама
Час ад часу ў нетрах нашай сацыяльна арыентаванай дзяржавы зараджаюцца сацыяльна-падтрымальныя ідэі тыпу банераў “Маё першае слова – каханне”
Парада: Больш крэатыву! Наша сацыяльная рэклама на стагоддзе адстае ад сусветных тэнденцый.
6. Беларускае аддзяленне філфака БрДУ
Цёпленькі і ўтульны інкубатар беларускай мовы ў брэсцкім вузе знаходзіцца, на жаль, у незайздросным стане. Як ні імкнуцца выкладчыкі наладзіць яго працу: і асабістым прыкладам ужывання мовы, і пагрозамі, і незалікамі, але тут, у кветніку, сярод студэнтаў мова папулярнасці не набывае.
Парада: Павысіць прахадны бал, каб на спецыяльнасці вучыліся толькі тыя, хто сапраўды закаханы ў беларускую мову і літаратуру.
7. Газета “Народная трыбуна”
Адзінае цалкам беларускамоўнае абласное выданне. Некалі было самай таннай газетай з праграмай TV і карысталася вялікай папулярнасцю.
Парада: Нешта рабіць з іміджам!
8. Іна Хоміч
Брэсцкая журналістка, якая каторы год нясе крыж беларускамоўнасці, час ад часу выслухоўваючы ад чытачоў праклёны. Але не здаецца!
Парада: Напісать кнігу “Як я раблю беларускамоўную журналістыку ў рускамоўным асяроддзі”.
9. Сьцяна
Ветэран брэсцкай рок-сцэны, гурт, які выконвае толькі беларускамоўныя песні і мае вялікую колькасць прыхільнікаў. Прыклад таго, што беларускае можа быць папулярным.
Парада: Заставацца беларускамоўнымі!
10. Шыльды “Гісторыка-культурная каштоўнасць” і назвы вуліц
Хай с памылкамі. Хай не ўсюды. Але на беларускай.
Парада: Некалькі разоў правяраць правільнасць напісання перад тым, як рабіць шыльды.
Фота: Марта МАРТЫНЮК, Зміцер БОСАК, facebook.com, Яўген Скавародка
Што яшчэ ёсць беларускамоўнага ў Брэсце? Прапаноўвайце ў каментах!